بعد سخريته من تصريحات مصطفى كامل.. صبري فواز: هيثم سعيد كتر خيره رد عليا
علق الفنان صبري فواز، على رد الفنان هيثم سعيد عليه، بشأن طلبه توضيحًا عن الفرق بين أغاني المهرجانات وأغنية “قشطة يابا” لنقيب الموسيقيين مصطفى كامل.
حيث كتب “فواز” من خلال حسابه الرسمي على موقع التواصل الاجتماعي “فيس بوك”، منشورًا قال فيه: ” طبيعي خالص أنه لما يبقى فيه حاجة مش فاهمينها ، نسأل أهل التخصص .. و ده االي انا عملته”.
وأضاف: “الوحيد اللي رد عليا ، هو أستاذ هيثم ( كتر خيره ) و من إجابته فهمت أن الفرق بين الاتنين .. ان دول واخدين تراخيص و دافعين رسوم، ودوكهما مش واخدين تراخيص و لا دافعين رسوم”.
واختتم: “”شكرا على التوضيح .. و انا كده فهمت و الموضوع انتهى، ألف شكر”.
هيثم سعيد يرد على سخرية صبري فواز من أغنية “قشطة يابا”
وكان الفنان صبري فواز، قد سخر من هجوم نقيب الموسيقيين على أغاني المهرجانات، وكتب عبر حسابه على “فيس بوك” منشورًا قال فيه: “عاوزين حد متخصص من نقابة المهن الموسيقية يفهمنا ويعلمنا ايه الفرق بين المهرجانات وأغنية قشطة يابا”.
ليرد عليه الفنان هيثم سعيد قائلًا: “أقول لحضرتك يا أستاذ صبري”قشطه يابا”، الشاعر بيقدم الكلمات للمصنفات الفنيه مكتوبه قبل التنازل للمطرب، بتفحصها لجنه قراءة للتأكد من خلوها من أي الفاظ أو ايحائات غير لائقه ومن أصالتها (مش مسروقه يعني) وبعد الموافقه اللي بتستغرق ٣ أيام عمل بييجي الشاعر مره كمان عشان يستلم الموافقه وبعدين يعمل التصريح، التنازل للفنان عشان يدخل يسجل الأغنيه وبعدها يطرحها، وإن لم يتم الموضوع بالألية السابقه تقوم النقابه بإتخاذ الإجراء المناسب نحو الفنان النقابي سواء “عامل، منتسب” سواء بالإيقاف أو الغرامة”.
وأضاف: “أما عن” المهرجان” بيكتب الأغنية، يسجلها، يطرحها يعني الفرق ما بينهم زي الفيلم اللي حضرتك بتمثله كده وافلام التيك توك بتاعة “ايه ده.. ده مالطو” أو الفيلم الإباحي اللي اتصور عند الهرم أو أي محتوى درامي خاص يعرض على الإنترنت بدون رقابه، بس يا أستاذنا”.
