صحة

أحمد رمزي يكشف عن مجموعه في الثانوية العامة وتفاصيل رسوبه في الجامعة

قال الفنان الشاب وصانع المحتوى أحمد رمزي، أنه علم بمجموعه في الثانوية العامة من أصدقاءه، وكان أهله يتوقعون حصوله على مجموع عالي.

وأضاف “رمزي” خلال لقاءه في برنامج “معكم” مع الإعلامية منى الشاذلي، “ساعة النتيجة كنت بايت عند خالتي أنا ومامتي في رمضان، وماكنتش أعرف ميعاد النتيجة، ونزلت ألعب مع ناس صحابي، وعرفت إن النتيجة هتظهر كمان كام ساعة”.

وتابع: “ماكملتش لعب روحت، وكنت بايت عند خالتي مرعوب وكل شوية أفتح اللاب أشوف النتيجة، نزلت أقابل واحد صاحبي قولت لازم أبقى برة البيت ساعة النتيجة، وفي البيت كانوا مستنيين أدخل تجارة إنجليش أقل حاجة، استنوا أجيب 95% أقل حاجة، وأنا في أولى ثانوي جيبت 49% وكنت شايل ملحق كيمياء، وفي تانية ثانوي جيبت 55%”.

أحمد رمزي: دخلت معهد التمثيل بعد سقوطي في كلية التجارة

واستطرد: “لما طلعت النتيجة لقيت صاحبي اللي كان قدامي في اللجنة بيعيط، قالي جاب 70%، وقالي إني جيبت 94%، ولما قولت لمامتي قالتلي جيبت 64% منين دول كدابين، وخلوني أعمل إعادة تصحيح ولقيت إن المفروض أخد الدرجات دي”.

وعن الكلية التي التحق بها قال: “قبل ما أدخل كلية التجارة عمي قال ده شكله دمه خفيف ما نخليه يمثل ويدخل معهد تمثيل بس قدمت وسقطت، وقعدت سنة في كلية التجارة وسقطت وقدمت بعدها في المعهد واتقبلت”.