تعلمت الباليه فى عمر 4 سنوات وحظى حلو بالشغل مع فاتن حمامة

تحدثت النجمة نيللى كريم، عن بدايتها في الحياة الفنية في لقاءها ببرنامج “ع اللوكيشن”، المذاع على راديو هيتس من تقديم شريف الليثى، قائلة: “نقطة بدايتي كانت في الإسكندرية بحكم إني اتولدت فيها، وبدأت أتعلم الباليه من وأنا عندى أربع سنين بس طبعًا كانت هواية”.

وأضافت نيللى كريم: “روحت روسيا قعدت عشر سنين وخلصت ثانوية عامة هناك واتعلمت باليه وموسيقى، وكنت بدرس باليه في أكاديمية الفنون قسم إخراج مسرح”.

أما عن محطاتها المهمة قالت نيللى كريم: “من ضمن أهم محطات حياتي هي محطة الفوازير من خلال أستاذتي دكتورة ماجدة عز وكان اقتراح أستاذ يحيي العلمى مع اني كنت شايفة الكارير بتاعي باليه بس، والمحطة التانية في حياتي لحظي الحلو شافتني سيدة الشاشة العربية فاتن حمامة وخلتني أمثل معاها في مسلسل “وجه القمر”، وكنت عاملة دور بنتها.

وتابعت نيللى كريم: “بعد كل ده كنت حاسة إن عمري ما هسيب الباليه لحد ما قابلت المخرجة العظيمة كاملة أبو ذكري وعملت معها فيلم “واحد صفر”، واتعلمت ان مفيش أي حاجة بتيجي بسهولة، وأى حاجة علشان توصلها بتقعد تعافر وتعاند مع نفسك وكل حاجة محتاجة صبر وشغل، وعملت حاجات راضية عنها وحاجات مش راضية عنها وحاجات كانت ممكن تبقي احسن لكن كل حاجة بتيجي بالتدريج، وأهم نقلة في حياتي كانت مسلسل “ذات”، ومسلسل “سجن النسا” كان محطة مهمة جدا في حياتي، و كان حظي حلو إني اشتغلت مع الأستاذ عادل إمام في فيلم “زهايمر”.